Նորվեգիայի ազգային հագուստը կոչվում է բյունադ։ Ազգային հագուստը այս երկրի վառ հատկանիշն է։ Ավանդաբար ազգային հագուստը փոխանցվում էր հորից որդուն, մորից աղջկան: Ազգային տարազը զարդարված է ձեռքով, ասեղնագործված նախշերով, արծաթյա զարդերով, ինչպես նաև թանկարժեք քարերով։ Առաջին անգամ բյունադը հայտնվեց գյուղացիների մեջ։ Որոշները պնդում են, որ այն օգտագործել են սովորական մարդիկ դաշտերում իրենց ամենօրյա աշխատանքի համար։ Այն ժամանակներում չկար տարազի հատուկ կոշտ ստանդարտ, համազգեստ ամբողջ երկրի համար։ Ազգային տարազը տարբերվում է կախված Նորվեգիայի տարածաշրջանից։ Հմուտ վարպետները տարազների ստեղծման մեջ բերեցին յուրահատուկ բազմազանություն, օգտագործելով իրենց բոլոր հմտությունները, կարողությունները և գեղարվեստական ճաշակը, որպեսզի իրենց ստեղծած հանդերձանքը դառնա լավագույնը: Եվ տասնիններորդ դարում բյունադը գյուղացիական հագուստից վերածվեց ազգային տարազի՝ պաշտոնապես ճանաչված ամբողջ Նորվեգիայում:
Տղամարդկանց ազգային հագուստ
Տղամարդկանց ավանդական բյունադը բաղկացած է ասեղնագործված վերնաշապիկից, մինչև ծնկներին հասնող շալվարից, ժիլետից, բաճկոնից, երկարաճիտ կոշիկներից, գլխարկից և պարտադիր արծաթյա աքսեսուարներից։ Բյունադի յուրաքանչյուր մասի տարբերությունը հսկայական են, բայց ամենամեծ բազմազանությունը կա ժիլետների, բաճկոնների և գլխարկների մեջ: Օրինակ, Նորվեգիայի հարավ-արևելքում գտնվող Ռումերիկայի ավանդական բաճկոնը պատրաստված է հատուկ բուրդից, և դրա երկարությունը պետք է լինի ծնկից ուղիղ տասը սանտիմետր բարձր: Իսկ արևելյան Նորվեգիայի Հեդեմարկ քաղաքի բնակչի ավանդական բաճկոնը միշտ սև է և գեղեցիկ կարով։
Կանանց ազգային հագուստ
Կանացի հագուստի ամբողջական հավաքածուն ներառում է՝ ասեղնագործությամբ զարդարված բլուզ, բաճկոն, հաստ բրդյա կիսաշրջազգեստ, ժիլետ, հատուկ գուլպաներ և կոշիկներ, շալ կամ շարֆ, ձեռնոցներ, արծաթե զարդերից պատրաստված գոտի, թանկարժեք մետաղներից պատրաստված և ձեռագործ զարդեր։ Կիսաշրջազգեստը հաճախ կրկնակի է, բլուզի վրա կոճակների փոխարեն օգտագործվում են արծաթյա ճարմանդներ, իսկ ժիլետն ամրացվում է արծաթյա շղթայով։
Կանացի կոստյումները շատ ավելի լայն կիրառություն ունեն՝ ի տարբերություն տղամարդկանց։ Սովորաբար աղջիկների համար հաստատման համար կարում են թանկարժեք ձեռագործ ազգային բյունադ։ Կանացի ազգային տարազը հաճախ կրում են հարսանիքների և այլ հատուկ միջոցառումների ժամանակ:
Հետաքրքիրն այն է, որ շատ մարդիկ, ովքեր ճամփորդել են Նորվեգիայում նշել են, որ նորվեգացիները հաճույքով ազգային հագուստ են կրում ոչ միայն տոն օրերին, այլ երբեմն նաև աշխատանքային օրերին։ Իսկապես, Նորվեգիայում մոդայիկ է ազգային հագուստ կրելը։ Չնայած, պետք է խոստովանել, որ հիմնականում ժողովրդական ոճով գունեղ ասեղնագործված կիսաշրջազգեստների և զգեստների այս նորաձևությունը կանանց համար է, քանի որ տղամարդկանց հագուստն ավելի շատ է փոխվել ժամանակի ընթացքում։
Իրինա Գյուրջինյան 